Мексикийн Нэгдсэн Улсад зохион байгуулагдсан "Дэлхийн тэргэнцэртэй мисс" шалгаруулах хоёр дахь удаагийн тэмцээнд Монгол Улсыг төлөөлөн Б.Лхамсүрэн амжилттай оролцож, шагналт тавдугаар байрт шалгарчээ.
Тус тэмцээнд Монгол Улс анх удаагаа оролцож байгаа юм. Мисс Б.Лхамсүрэнгийн хувьд 2019 онд Улсын хэмжээнд зохион байгуулагдсан “Тэргэнцэртэй сайхан бүсгүй-2” тэмцээний Үндэсний ялагч болж, дэлхийд өрсөлдөх эрхийн эзэн болсон билээ. Тэрээр тус тэмцээний “Авьяас” төрөлд тэргэнцэртэй бүжиг бүжиглэж, хамгийн өндөр оноог авсан юм.
