М.Саран 
Хүний нөөцийн удирдлагын мэдээллийн тогтолцоо” цахим системийн суурь модулийг хөгжүүлснээр төрийн албаны цалингийн нэгдсэн системтэй холбон мэдээлэл солилцдог болсон. Үүний үр дүнд цалингийн давхардал, томилгооны зөрчил илрүүлэх, статистик судалгаа, тайлан гаргах, дүгнэхэд цаг хугацаа хэмнэх, төрийн албан хаагчийн бүртгэл хөдөлгөөний мэдээлэл шуурхай хийгдэх, мэдээллийг удирдан боловсруулах, баталгаатай үндэслэл болох, албан тушаал, орон тоонд хяналт тавих нөхцөл бүрдсэн зэрэг олон давуу талтай болжээ.
Цахим системд өнөөдрийн байдлаар төрийн 4250 байгууллагын албан хаагчийн бүртгэл мэдээллийг нэгтгээд байна. Энэхүү цахим систем дэх мэдээллийг судалгаа дүн шинжилгээ хийх, бодлого хөтөлбөр боловсруулахад ашиглах зорилгоор Төрийн албаны зөвлөлөөс Засгийн газрын Хэрэг эрхлэх газарт системийн танилцуулгыг хийж, хамтран ашиглах, цаашид хөгжүүлэх зарчим, чиглэлийн талаар санал солилцож, хамтран ажиллахаар болов.
Цахим засаглалд шилжих, хүнд суртал, авлигагүй төрийн үйлчилгээг бүрдүүлэх үндэсний хорооны хуралдааны үеэр Монгол Улсын Ерөнхий сайд Л.Оюун-Эрдэнэ төрийн байгууллагууд мэдээллээ харилцан солилцох, нэг цонхоор иргэдэд үйлчлэхийг онцолсон.
Цахим системд шилжсэнээр төрийн байгууллагууд албан хаагчдын мэдээлэл, лавлагаа үйлчилгээг 2-3 секундийн хугацаанд харилцан солилцож, хүнд суртал, шат дамжлагыг бууруулах юм гэж Төрийн албаны зөвлөлөөс мэдээллээ.
