“Тогтвортой хөгжил-нүүдлийн мал аж ахуй” сэдвээр олон улсын уулзалт болно

“Даян дэлхийн тогтвортой мал аж ахуй хөтөлбөрийн олон талт түншүүдийн 8 дахь удаагийн уулзалт”-ыг Монгол Улсад анх удаа 2018 оны 6 дугаар сарын 11-15-ны өдрүүдэд зохион байгуулах гэж байна. Даян дэлхийн тогтвортой мал аж ахуй хөтөлбөр, НҮБ-ын Хүнс, хөдөө аж ахуйн байгууллага, Хүнс, хөдөө аж ахуй, хөнгөн үйлдвэрийн яам хамтран зохион байгуулж буй 8 дугаар уулзалтад 34 орны 120 гаруй төлөөлөгч, бүс нутгийн улсуудын Хөдөө аж ахуйн сайд нар, Монгол Улсын төлөөлөгчид оролцоно.

Уулзалтаар “Тогтвортой хөгжил-нүүдлийн мал аж ахуй” сэдвийн дор таван өдрийн турш чуулах бөгөөд НҮБ-ын Тогтвортой хөгжлийн зорилтуудыг хангахад мал аж ахуйн салбарын оруулах хувь нэмрийг Монгол Улсаар төлөөлүүлэн дэлхий нийтэд харуулна.

Олон улсын уулзалтыг Монгол Улсад зохион байгуулснаар нүүдлийн мал аж ахуйн онцлог, уламжлалт ёс заншлаа олон улсад сурталчлан таниулах, мал аж ахуйн салбарт баримталж буй бодлого, төсөл хөтөлбөрүүдийнхөө талаар гадны төлөөлөгчид танилцуулж, улмаар хөрөнгө оруулалт татах боломж бүрдэх юм.